Acts 8

1Saul e donu hua gi tadaaligi o Stephen gi made

Saul e hagahuaidu di nohongo dabu

Malaa, di laangi hua deelaa, di nohongo dabu dela i Jerusalem gu kae tadaaligi damana. Digau huogodoo ala ne hagadonu, i daha mo nia gau agoago hagau, ga llele dagidahi gi lodo Judea mo Samaria. 2Hunu daangada daumaha maaloo gu hai nadau hangihangi gi Stephen, ga danu a mee.

3Saul ga hagamada belee oho di nohongo dabu. Mee ga hagadau i hongo nia adu hale, gei mee ga datada mai nia daangada ala gu hagadonu, nia daane mo nia ahina, ga kili digaula gi lodo di hale galabudi. ^a

Di Longo Humalia e hagadele i lodo Samaria

4Digau hagadonu ala ne llele gi daha, gu dau i nia guongo huogodoo, ga agoago di Longo Humalia. 5Philip ga hana gi di waahale i lodo Samaria, ga agoago gi digaula di hai o di Mesaia. 6Digau dogologo gu hagalongo hagahumalia gi nia agoago a Philip, ge gu gidee ginaadou nia mogobuna a maa ala ne hai. 7Nia hagataalunga huaidu gu ulu gi daha mo digau dogologo mo di tangitangi gi nua loo. Gei dogologo i digau ala ne mmade nadau huaidina, e mmade nadau wae ge deemee di heehee, la gu humalia. 8Malaa, di tentene damanaiee gu haga honu di waahale deelaa.

9Taane dono ingoo go Simon e noho i lodo di waahale deelaa, gei digau Samaria nogo goboina huoloo i ana buubuu, gei mee e hai bolo ia tangada aamua. 10Gei digau huogodoo ala e noho i lodo di waahale deelaa, digau lligi mo digau aamua, e hagalongo huoloo gi mee, mo di helekai boloo, “Go mee dela go di mogobuna o God, dela e dugu go gidaadou boloo, “Di Mogobuna Aamua”.” 11Digaula gu hagalongo huoloo gi mee, idimaa, nia buubuu a maa gu haga goboina digaula di madagoaa waalooloo. 12Gei di madagoaa digaula ne hagadonu nia agoago a Philip, di hai o di Longo Humalia o Tenua o God, mo di ingoo o Jesus Christ, digaula huogodoo, nia daane mo nia ahina, la gu babdais. 13Simon gu hagadonu labelaa, gu babdais, gei mee gu madalia Philip, gu goboina huoloo i dana mmada gi nia mogobuna haga goboina ala ne hai.

14Gei digau agoago hagau ala e noho i Jerusalem ga longono bolo digau Samaria gu kae nia helekai a God, gei ginaadou ga hagau a Peter mo John gi baahi digaula. 15Di dau o Peter mo John i Samaria, meemaa ga dalodalo i digau ala ne hagadonu, bolo digaula gi kae di Hagataalunga Dabu. 16Idimaa, di Hagataalunga Dabu la digi haneia gi baahi o dahi dangada i digaula, gei digaula ne babdais hua i di ingoo o Tagi go Jesus. 17Peter mo John ne dugu nau lima gi hongo digaula, gei digaula gu kae di Hagataalunga Dabu. 18Malaa, Simon ga gidee ia bolo digaula gu kae di Hagataalunga i di dugu nia lima o digau agoago hagau gi hongo digaula, gei mee ga wanga gi Peter mo John nia bahihadu, 19ga dangi ang gi meemaa, “Goolua gaamai gi di au gulu mogobuna aanaa, gei nia daangada huogodoo ala ma ga dugu ginai ogu lima gi nonua, ga kae di Hagataalunga Dabu.” 20Peter ga helekai gi mee, “Goe mo au bahihadu ga kili gi lodo di ahi, idimaa, goe e hagamamaanadu bolo goe e mee di hui di wanga dehuia a God gi nia bahihadu! 21Goe doo duhongo hegau ai ge hagalee dau i lodo madau hegau, idimaa, doo manawa la hagalee donu i mua nia hadumada o God. 22Huli gi daha mo dau maanadu huaidu deenaa. Dangidangi ang gi Dimaadua gi dumaalia adu i au hagadilinga maanadu huaidu aanaa. 23Idimaa, au gu iloo bolo goe e honu i di manawa dubua, ge gu lawalawa go di huaidu!” 24Simon ga helekai gi Peter mo John, “Dumaalia mai, dalodalo ang gi Dimaadua i nia mee ala gu helekai ai goolua gi dee hai mai gi di au.”

25Malaa, i muli hua di hai nau haga modongoohia mo di agoago i nia helekai a Tagi, Peter mo John ga hula labelaa gi Jerusalem. I di nau loo adu, meemaa gu hagadele di Longo Humalia i nia guongo e logo i Samaria.

Philip mo tagi Ethiopia

26Tangada di langi o Dimaadua ga hai gi Philip, “Hagatogomaalia ina goe, hana gi ngaaga gi di ala dela e hanimoi i Jerusalem e hana gi Gaza.” (Di ala deenei la gu hagalee hai hegau i nia laangi aanei.) 27Gei Philip ga hagatogomaalia ga hana. Di madagoaa hua deelaa, gei taane-“eunuch” mai Ethiopia e hana labelaa gi dono guongo i dono waga hongo henua. Taane deenei di tagi hagalabagau e benebene nia bahihadu a Candace, di Kwini o Ethiopia. Mee nogo i Jerusalem nogo daumaha ang gi God. I dono hanimoi, gei mee nogo dau di Beebaa go Isaiah. 29Di Hagataalunga Dabu ga helekai gi Philip, “Hana gi baahi di waga hongo henua deelaa gi hoohoo goe gi di maa.” 30Philip ga lele, ga hagalongo gi mee e dau di beebaa soukohp Isaiah. Geia ga heeu, “Goe e iloo au mee aanaa e dau?” 31Taane deelaa ga helekai gi mee, “Dehee dagu hai ga iloo eau maa tangada ne haga modongoohia mai gi di au ai?” Mee ga gahi a Philip gi gaga aga, gi noho i dono baahi i hongo dono waga hongo henua. 32Di gowaa dela nogo dau go mee i lodo di Beebaa Dabu la deenei:

“Mee e hai gadoo be di siibi dela ma ga dagi, e daaligi gi made. Geia e hai be tamaa siibi dela hagalee dangi i dono madagoaa ma ga hai gi daha ono ngaahulu, gei mee e noho hua dee muu. ^b 33Gei mee ne haga langaadia, gei digau hai gabunga ne haga de iloo ginaadou a mee. Deai tangada e mee di helekai i dono madahaanau ai, idimaa, dono mouli i henuailala nei la gu hagaodi.”
34Taane deelaa ga heeu gi Philip, “Hagia mai malaa, ma koai dela e helekai ai di soukohp? Mee e helekai i deia, be tangada i golo?” 35Philip ga daamada ga helekai mai i nia gubu aanei i lodo di Beebaa Dabu, ga hagi ang gi mee di Longo Humalia o Jesus. 36I di nau llele adu laa hongo di ala, gei meemaa gu dau i di gowaa nia wai, gei taane deelaa ga helekai, “Aanei nia wai, ma di aha dela e haga deaadee au belee babdais?” 37[Philip ga helekai gi mee, “Goe e mee di babdais maa goe ga hagadonu aga i lodo doo manawa hagatau.”

Taane deelaa ga helekai, “Au e hagadonu bolo Jesus Christ di Tama ni God.”] 38Gei taane deelaa gu haga dogo di nau waga hongo henua, meemaa ga too gi lala, ga hula gi lodo di monowai, gei Philip ga babdais taane deelaa. 39I di nau lloo aga i lodo di monowai, gei di Hagataalunga o Dimaadua, ga llahi a Philip gi daha, gei taane deelaa gu de gidee ia a mee, ga hanadu hua i dono ala mo di tentene huoloo. 40Gei Philip gu dau i Azotus, ga hana, ga hagadele di Longo Humalia i lodo nia waahale huogodoo, ga dau loo i Caesarea.